Jaridar Sarauniya ta samu zantawa da daya daga cikin jaruman shirin wasan gidan talabijin mai nisan Zango (Series) "DADIN KOWA" mallakin tashar Arewa 24 akan tauraron dan Adam.
FATIMA SA'ID ABDULLAHI wada aka fi sani da Bintu a cikin shirin DADIN KOWA a tattaunawarta da editan labaran Sarauniya RABIU MUHAMMAD (Abu Hidaya) ta bayyana abubuwa da yawa da suka shafeta da kuma masana'antar shirya finafinan Hausa (Kannywood)
DA WA MUKE TARE?
Suna na Fatima Sa'id Abdullahi wadda aka fi sani da Bintu a cikin shirin DADIN KOWA.
WACE RAWA KIKE TAKAWA A CIKIN SHIRIN DADIN KOWA?
Na kan fito a 'yar masu kudi wadda ta kasance 'yar gata a wurin iyayenta, domin ni kadaice a wurin mahaifina da mamana, sannan mahaifiyata ta shagwa6ani abin da nake so shi ake min.
YAYA A KA YI KIKA TSINCI KANKI A SHIRIN DADIN KOWA?
(Dariya) to ka san da yake komai hanya ce, zan iya cewa hanya aka yi min, na yi dace kuma aka dauke ni.
DAMA KINA CIKIN MASANA'ANTAR SHIRYA FINAFINAI TA KANNYWOOD?
E ina ciki, amma ba wani dadewa na yi ba domin ba zan wuce shekara uku ba.
TSAWON SHEKARA UKU DA KIKA YI A MASANA'ANTAR ME ZA KI CE A KANTA?
To ni dai gaskiya ban mata kallon komai ba, kawai ni dai na zo na yi fim kuma sana'a na dauki abin, kuma kasan idan za ka zauna da mutane yau da gobe sai hakuri, za ka 6atawa wani, wani kuma ya 6ata maka haka dama zaman duniya yake komai sai an yi hakuri.
MUTANEN DA SUKE WAJEN KANNYWOOD SUNA MUKU KALLON LALATATTU ME ZA KI CE GAME DA HAKA?
To wannan gaskiya ne akwai mutane da yawa wadanda ba 'yan fim ba, idan mutum zai yi aure ko zai auri yar fim sai su ce su ba za su yarda na su ya auri 'yar fim ko dan fim ba.
Ban ce babu lalatattu a cikinmu ba, amma ba duka aka taru aka zama daya ba, akwai masu mutunci da yawa a cikinmu.
Fim din nan sana'a ce, yadda kowa yake tafiya ya je wurin aikinsa haka muma muke tafiya wurin namu aikin, sana'a muka dauketa kuma iyayenmu suna mana addu'a game da haka.
SU WAYE SUKA FI YAWA A KANNYWOOD NAGARI KO NA BANZA?
(Dariya sosai) gaskiya ba zan iya bayar da amsar nan ba, amma dai ni nagari na hadu da su.
TSAWON SHEKARA UKU DA KIKA YI A KANNYWOOD FIM NAWA KIKA YI?
To a gaskiya na yi finafinai masu yawa amma fitattu a ciki su ne:-
Bilhakki
Sanadin Rayuwa
Wuta a masaka
Aikin Gida da sauransu.
WADANNAN FINAFINAI DA KIKA AMBATA A WANI MATSAYI KIKA FITO?
Gaskiya kowanne na taka rawa daidai gwargwado ga wadanda suka kalli fim din za su gani.
MATSAYIN KARATU FA?
To maganar karatu kam iya sakanadire na tsaya ban ci gaba ba, amma In sha Allahu ina sa ran ci gaba.
YA LABARIN AURE FA?
(Dariya sosai) to yanzu kam babu aure amma muna nan muna jira duk lokacin da Allah Ya kawo muna so, mu ai bama gudunsa.
AMMA KIN SAYAR KO ANA KASUWA?
(Dariya sosai tare da sunkuyar da kai)To zan iya cewa na siyar zan kuma iya cewa ban sayar ba. Amma maganar gaskiya a kasuwa nake ban sayar ba. Kasan halin naku na maza sai a hankali.
WANE KALUBALE KIKA FUSKANTA A KANNYWOOD?
To wallahi ni dai sai na ce na godewa Allah don babu wani kalubale da zance na taba fuskanta a wannan masana'anta ta wasan Hausa da har zan rike shi a zuciyata ko cikin rayuwata.
KIN TABA SAMUN WATA KYAUTA A SANADIN WANNAN SANA'A DA ZA KI YI ALFAHARI DA ITA?
Maganar gaskiya na samu alherai da yawa a wannan sana'a wadanda ba zan iya misalta su ba.
MENE NE BURINKI A WANNAN SANA'A?
To alhamdulillahi ni dai a wannan sana'a idan suna ne Allah Ya ba ni domin yanzu duk inda zan wuce za ka ga jama'a na cewa ga Bintu da dai maganganu masu yawa, ko iya nan, ni alhamdulillahi na godewa Allah, amma kasan hausawa na cewa "Kogi bai ki dadi ba" ko haka ubangiji ya bar ni burina ya cika.
WANE NE JARUMINKI A KANNYWOOD?
Ni duk wani jarumi mai taka rawa a masana'antar shirya fim jarumina ne.
WANE ABINCI KIKA FI?
Ni dai a rayuwata na fi son taliya.
YANAYI FA?
Na fi son yanayi na sanyi a rayuwata.
MUN GODE
Ni ma na gode.
Post a Comment
0 comments
Dear readers, after reading the Content please ask for advice and to provide constructive feedback Please Write Relevant Comment with Polite Language.Your comments inspired me to continue blogging. Your opinion much more valuable to me. Thank you.